Skip to main content

ದಾರಿ ಯಾವುದಯ್ಯಾ ವೈಕುಂಠಕೆ?

ನನ್ನ ಕೇಳಿದ್ರೆ ’ದಾರಿಯಾವುದಯ್ಯಾ, ವೈಕುಂಠಕೆ ದಾರಿತೋರಿಸಯ್ಯ’ ಅಂತ ಕೇಳ್ಬೇಕಾಗೇ ಇಲ್ಲ. ಯಾಕಂತಂದ್ರೆ, ಸಂಸ್ಕೃತದಲ್ಲೊಂದು ಮಾತೇ ಇದೆಯಲ್ಲ?
आकाशात् पतितम् तोयम् यथा गच्छति सागरम् ।
सर्वदेव नमस्कारः केशवम् प्रति गच्छति ॥

ಆಕಾಶಾತ್ ಪತಿತಂ ತೋಯಂ ಯಥಾ ಗಚ್ಛತಿ ಸಾಗರಮ್ |
ಸರ್ವದೇವ ನಮಸ್ಕಾರಃ ಕೇಶವಂ ಪ್ರತಿ ಗಚ್ಛತಿ ||

ಹಾಗಂದ್ರೆ, ಎಲ್ಲಾದಾರಿಗಳೂ ಹೋಗೋದು ವೈಕುಂಠಕ್ಕೇನೇ. ಅಥ್ವಾ, ನಿಮಗೆ ಬೇಕಾದ್ರೆ ಎಲ್ಲಾದಾರಿಗಳೂ ಹೋಗೋದು ಕೈಲಾಸಕ್ಕೆ ಅಂತ ಇಟ್ಕೊಳ್ಳಿ. ತಪ್ಪೇನಿಲ್ಲ. ಅಥವಾ, ಬರೀ ಶಿವ ವಿಷ್ಣು ವಿಷಯ ಯಾಕೆ ಅನ್ನೋದಾದ್ರೆ ’ಎಲ್ಲಾ ದಾರಿಗಳೂ ಸ್ವರ್ಗಕ್ಕೇ ಹೋಗೋದು’ ಅಂತ ಹೇಳ್ಬಿಡಬಹುದು. ಯಾರಿಗೂ ಬೇಜಾರಾಗೋದಿಲ್ಲ. ಆದ್ರೆ ಈಗ ಡಿಸೆಂಬರ್ ತಿಂಗ್ಳಲ್ವಾ, ಅದಕ್ಕೇ ಇದನ್ನ ಸ್ವಲ್ಪ ಬದ್ಲಾಯ್ಸಿ ಹೇಳೋದು ಒಳ್ಳೇದು ಅನ್ಸತ್ತೆ. ’ಎಲ್ಲಾ ದಾರಿಗಳೂ ಹೋಗೋದು ಮೈಲಾಪುರಕ್ಕೆ’ ಅಂದ್ಬಿಡೋಣ. ಹೌದು. ಮೈಲಾಪುರ. ಅಂದ್ರೆ ಸ್ವರ್ಗ. ಸಂಗೀತ ಸ್ವರ್ಗ.

ಗೊತ್ತಾಯ್ತಲ್ಲ? ತಿಂಗಳು ಡಿಸೆಂಬರ್ ಆದ್ರೆ, ನೀವು ಹೋಗ್ಬೇಕಾದ್ದು ಮದರಾಸಿಗೆ. ಮದ್ರಾಸಿಗೆ ಹೋದರೆ, ನೀವು ಅಲ್ಲಿ ತೆರಳಬೇಕಾದ್ದು ಮೈಲಾಪುರಕ್ಕೆ. ಕರ್ನಾಟಕ ಸಂಗೀತ ರಸಿಕರಿಗೆಲ್ಲ ಮೈಲಾಪುರ ಅಂದ್ರೆ, ಡಿಸೆಂಬರ್ ತಿಂಗಳಿನ ಕಾಶಿ ಅಂತಲೇ ಅರ್ಥ. ನೀವು ಸಂಗೀತಪ್ರೇಮಿಯಾಗಿದ್ದು ಈ ತಿಂಗಳು ಅಲ್ಲಿಗೆ ಹೋದ್ರೆ, ಕಾಶೀಯಾತ್ರೆಗಿಂತ ಹೆಚ್ಚು ಫಲ ನಿಮಗೆ ದಕ್ಕುತ್ತೆ ನೋಡಿ.

ಚೆನ್ನೈ, ಸೆನ್ನೈ, ಚೆನ್ನಪಟ್ಟಣಂ, ಮೈಲಾಪುರ, ಮಯಿಲೈ ... ! ಹೆಸರಲ್ಲೇನಿದೇ ರೀ? ಶೇಕ್ಸ್ ಪಿಯರ್ ಹೇಳ್ಲಿಲ್ಲವೇ? ಗುಲಾಬೀನ ಯಾವ ಹೆಸರಲ್ಲಿ ಕರೆದರೆ ಏನು, ಅದರ ಪರಿಮಳಕ್ಕೆ ಕುಂದಾಗೋದಿಲ್ಲ ಅಂತ. ಏನ್ಬೇಕಾದ್ರೂ ಕರೀರಿ - ಆದ್ರೆ ಮದ್ರಾಸಿನಲ್ಲಿ ಡಿಸೆಂಬರ್ ನಲ್ಲಿ ಹರಡೋ ಸಂಗೀತದ ಪರಿಮಳ, ಅಲ್ಲಿರೋ ಕೂವಮ್ ಅಡಯಾರ್ ಗಳ ಕೊಳಕು ನಾತವನ್ನ ಮುಚ್ಚಿಹಾಕೋದ್ರಲ್ಲಿ ಅನುಮಾನವಿಲ್ಲ.

ಆಗಲೇ ಹದಿನೈದು ವರ್ಷ ಕಳೆದಿದೆ. ಆದರೂ ಇನ್ನೂ ನೆನ್ನೆಯೋ ಮೊನ್ನೆಯೋ ಅನ್ನಿಸ್ತಿದೆ. ಒಂದು ಸಭೆಯಿಂದ ಇನ್ನೊಂದು ಸಭೆಗೆ ಓಡೋದು. ಪಲ್ಲವನ್ ಬಸ್ ಹತ್ತೋದು. ಇಲ್ಲ ಸೈಕಲ್ ಅಥ್ವಾ ಲೂನಾ. ಯಾವ್ದೂ ಇಲ್ದಿದ್ದ್ರೆ, ನಡೆದೇಬಿಡೋದು. ಮೈಲಾಪುರ್ ಫೈನ್ ಆರ್ಟ್ಸ್ ಇಂದ ಆಳ್ವಾರ್ ಪೇಟೆ. ಅಡಯಾರ್ ಅನಂತಪದ್ಮನಾಭಸ್ವಾಮಿ ದೇವಸ್ಥಾನದಿಂದ ತಿ.ನಗರ್ ವೆಂಕಟರಮಣ ದೇವಸ್ಥಾನ. ವಾಣಿಮಹಲ್ ಇಂದ ಕೃಷ್ಣ ಗಾನ ಸಭಾ. ಎಲ್ಲೆಲ್ಲಿಗೆ ಆಗತ್ತೋ ಎಲ್ಲ ಕಡೆಗೂ ಹೋಗಿದ್ದು. ಈ ರಾಜ್ಯಕ್ಕೆ ರಾಜಧಾನಿ ಅಂದ್ರೆ ಅದು ಮೈಲಾಪುರವೇ ಸರಿ. ವೇಳೆಗೇನೂ ಕೊರತೆ ಇರಲಿಲ್ಲ ಬಿಡಿ, ಕಾಲೇಜಲ್ಲಿರೋವಾಗ ಸಮಯಕ್ಕೆ ಕೊರತೆ ಎಲ್ಲಿರತ್ತೆ - ಕ್ಲಾಸ್ ಬಂಕ್ ಮಾಡ್ತಾ ಇದ್ರಾಯ್ತು ಅಷ್ಟೇನೇ! ನಿಜ ಹೇಳ್ಬೇಕು ಅಂದ್ರೆ ಎರಡು ಚಳಿಗಾಲ ನಾನು ಮದ್ರಾಸ್ .. ಅಲ್ಲ ಅಲ್ಲ ಚೆನ್ನೈ :) ನಲ್ಲಿದ್ದದ್ದು ನನ್ನ ಅದೃಷ್ಟವೇ ಸರಿ ಅಂತ ಭಾವಿಸ್ತೀನಿ.

ನಾನು ಮದ್ರಾಸಿಗೆ ಮೊದಲ್ನೇ ಸಲ ಕಾಲಿಟ್ಟ ಗಳಿಗೆ ನನ್ಗೆ ಮರೆಯೋದೇ ಇಲ್ಲ. ಜುಲೈ ಕೊನೇ ವಾರ. ನನ್ನ ಹುಟ್ಟುಹಬ್ಬದ ದಿನ ಅವತ್ತು. ನಮ್ಮೂರಿನ ಲೆಕ್ಕಕ್ಕೆ ನಡುಮಳೆಗಾಲ. ನಮ್ಮನೇ ರಸ್ತೆ ಅಂತೂ ಕೊಚ್ಚೆ ಮಯವಾಗಿ ಒಂತರಹಾ ನಡೆಯೋ ಬದಲು ಸ್ಕೇಟಿಂಗ್ ಅನುಭವ ತರ್ತಾ ಇತ್ತು. ಅಲ್ಲೀವರೆಗೆ ಸಮುದ್ರದಿಂದ ೩೦೦೦ ಅಡೀ ಎತ್ರದಲ್ಲಿರೋ ನಮ್ಮೂರನ್ನ ಬಿಟ್ಟು ಇನ್ನೊಂದೂರಲ್ಲಿ ಹೆಚ್ಚು ದಿನ ಇದ್ದು ಅಭ್ಯಾಸವಿಲ್ಲದ ನನಗೆ ಇನ್ನೆರಡು ವರ್ಷ ನನ್ನ ಮನೆ ಅಂತ ಅಂದ್ಕೋಬೇಕಾಗಿದ್ದ ಈ ಸಮುದ್ರದ ಪಕ್ಕದ ಊರಿನ ಹವಾಮಾನ ಎಷ್ಟು ಕೆಟ್ಟದಾಗಿರಬಹುದು ಅನ್ನೋ ಹೊಳವು ನನಗಿರಲಿಲ್ಲ. ಸುಮ್ಸುಮ್ನೇ ನಮ್ಮೂರಲ್ಲ ಬಡವರ ಊಟಿ ಅಂತಿದ್ರೇ ಮತ್ತೆ? ಚೆನ್ನೈ ಸೆಂಟ್ರಲ್ ನಲ್ಲಿ ರೈಲಿಂದಿಳಿದು ಪ್ಲಾಟ್‍ಫಾರ್ಮ್ ಮೇಲೆ ಕಾಲಿಡ್ತಿದ್ದ ಹಾಗೇ ಒಂದು ಭಟ್ಟೀಮನೆಗೆ ಬಂದ ಅನಿಸಿಕೆ. ಇಲ್ಲಿಗೆ ಯಾಕಾದ್ರೂ ಬಂದೆನಪ್ಪ ಅಂತ ಮನಸ್ಸಿನಲ್ಲಿ ಒಂದು ಮೂಲೆಯಲ್ಲೊಂದು ಯೋಚನೆ ಬರ್ತಾ ಇತ್ತು. ಜೊತೆಗೆ, ಉರಿಯೋ ಗಾಯಕ್ಕೆ ಉಪ್ಪು ಸುರಿದ ಹಾಗೆ, ಗಾಳಿಯಲ್ಲೆಲ್ಲ ಕೂವಂ ನ ದುರ್ಗಂಧ! ಇಲ್ಲಿ ಎರಡು ವರ್ಷ ಹೇಗಿರ್ತೀನೋ ಅನ್ನೋ ಯೋಚನೇಲೇ ಸ್ಟೇಷನ್ ಬಿಟ್ಟಿದ್ದಾಯ್ತು.

ಮೊದ್ಲನೇ ದಿನದ ಈ ಆಘಾತದಿಂದ ಅಂತೂ ಹೊರಬರೋದಕ್ಕೆ ಆಯ್ತು. ಆಕಡೆ ಕ್ಲಾಸ್ ಗಳೂ ಶುರುವಾದವು. ಹೊಸ ಗೆಳೆಯರು. ಕೇಳೋದಕ್ಕೆ ಚೆನ್ನೈ ವಾನುಲಿ ನಿಲಯಂ. ಮದ್ರಾಸ್ ರೇಡಿಯೋ ಸ್ಟೇಷನ್ ಬಹಳ ಒಳ್ಳೇದಿತ್ತು. ಬೇಕಾದಷ್ಟು ಸಂಗೀತ. ನಮ್ಮ ಆಕಾಶವಾಣಿ ಬೆಂಗಳೂರು ಭದ್ರಾವತಿ ಮೈಸೂರಿಗಿಂತಲೂ ತುಂಬಾ ಚೆನ್ನಿತ್ತು. ಮತ್ತೆ ಅದರ ಜೊತೇಲಿ ತಮಿಳು ಕಲಿಯೋ ಕೆಲ್ಸ ಬೇರೆ. ಕೆಲವೇ ವಾರಗಳಲ್ಲಿ ತಮಿಳು ಮಾತಾಡೋದೊಂದೇ ಅಲ್ಲ, ಓದಿ ಬರೆದು ಮಾಡೋದೂ ಕಲ್ತು ಬಿಟ್ಟೆ. ಇಲ್ಲ, ನಾನು ’ಮೂವತ್ತು ದಿನದಲ್ಲಿ ತಮಿಳು ಕಲಿ’ ಅನ್ನೋ ಪುಸ್ತಕ ತೊಗೊಳ್ಳಲೇ ಇಲ್ಲ. ನಿಜ ಹೇಳ್ಬೇಕಂದ್ರೆ ತಮಿಳು ಓದಿ ಬರೆದು ಮಾಡೋದು ನಾನಂದುಕೊಂಡಿದ್ದಕ್ಕಿಂತ ಸುಲಭವಾಗಿತ್ತು. ಮೌಂಟ್ ರೋಡ .. ಅಲ್ಲಲ್ಲ ಅಣ್ಣಾ ಸಾಲೈನ ಎರಡೂ ಕಡೆ ನೂರಾರು ಸಿನೆಮಾ ಪೋಸ್ಟರ್ ಗಳು ಇರ್ತಿದ್ವಲ್ಲ? ಸುಮಾರು ಎಲ್ಲ ಪೋಸ್ಟರ್ಗಳೂ, ಬೋರ್ಡ್ಗಳೂ ಇಂಗ್ಲಿಷ್ ಮತ್ತೆ ತಮಿಳು ಎರಡೂ ಲಿಪಿಯಲ್ಲಿರ್ತಿದ್ದವು, ಪಲ್ಲವನ್ ಬಸ್ ಗಳನ್ನ ಬಿಟ್ಟು. ನಟ ನಟಿಯರ ಹೆಸರುಗಳಂತೂ ನನ್ಗೆ ಗೊತ್ತೇ ಇತ್ತಲ್ಲ.ಮತ್ತೆ ರೆಸ್ಟುರಾಗಳಲ್ಲಿನ ಮೆನು ಕಾರ್ಡ್ ಕೂಡ ಉಪಯೋಗಕ್ಕೆ ಬಂತು. ಯಾಕಂದ್ರೆ ಅಲ್ಲಿರ್ತಿದ್ದ ಇಡ್ಲಿ ದೋಸೆ ಚಟ್ನಿ ಸಾಂಬಾರ್ ಎಲ್ಲ ನನಗೆ ಗೊತ್ತಿರೋವೇ. ಅಂತೂ ಇಂತೂ ಪ್ಯಾಟರ್ನ್ ಮ್ಯಾಚಿಂಗ್ ಮಾಡ್ತಾನೇ ಓದಿ ಬರ್ಯೋದು ಕಲಿತುಬಿಟ್ಟೆ. ಕೆಲವು ವಾರದ ನಂತರ ತೇನಾಂಪೇಟೆಯ ಥಿಯೇಟರ್ ಒಂದರಲ್ಲಿ ಸಿನೆಮಾಗೆ ಹೋದಾಗ ಅಲ್ಲಿ ಬರೋ ಕ್ರೆಡಿಟ್ಗಳನ್ನ ನಾನು ಓದೋದು ನೋಡಿ ನನ್ನ ಅಣ್ಣ ಸುಮಾರು ಕುರ್ಚಿಯಿಂದಲೇ ಬಿದ್ಬಿಟ್ಟಿದ್ದ!

ಕೆಲವೇ ತಿಂಗಳಲ್ಲಿ ಮದ್ರಾಸ್ನಲ್ಲಿ ಬಹಳ ಒಳ್ಳೇ ಸಂಗೀತ ಸಿಕ್ಕುತ್ತೆ ಅನ್ನೋದು ನನ್ಗೆ ತಿಳಿದು ಹೋಯ್ತು. ಅಲ್ಲೀವರೆಗೆ ನನಗೆ ’ಮ್ಯೂಸಿಕ್ ಸೀಸನ್’ ಅನ್ನೋದೊಂದಿದೆ ಅಂತ ಗೊಟ್ಟೇ ಇರಲಿಲ್ಲ. ಪ್ರತಿ ವರ್ಷ ಡಿಸೆಂಬರ್ ಜನವರಿಯಲ್ಲಿ ಮದ್ರಾಸಿನಲ್ಲಿ ನೂರಾರು ಕಡೆ ಸಭೆಗಳು ಸಂಗೀತ ಕಚೇರಿಗಳನ್ನ ಏರ್ಪಡಿಸತ್ವೆ. ನಿಜ ಹೇಳ್ಬೇಕಂದ್ರೆ, ನಿಮಗೆ ಹೋಗ್ಬೇಕು ಅನ್ನಿಸೋ ಎಲ್ಲ ಕಾರ್ಯಕ್ರಮಗಳನ್ನ ನೋಡ್ಬೇಕಂದ್ರೆ ನೀವು ಸರ್ವಾಂತರ್ಯಾಮಿ ಆಗ್ಬೇಕಷ್ಟೇ! ಈ ಸಂಗೀತದ ಕಾಲಕ್ಕೇನೇ ಅನ್ನೋ ಹಾಗೆ, ಯಾವಾಗಲೂ ಬೆವರಿಳಿಯೋ ಮದ್ರಾಸಿನ ಹವಾಮಾನವೂ ಸ್ವಲ್ಪ ಉತ್ತಮವಾಗಿರತ್ತೆ. ನಿಮಗ ಆಸಕ್ತಿ, ಮತ್ತೆ ಬೇಕಾದಷ್ಟು ಹೊತ್ತು ಇದ್ದರೆ ನಿಮ್ಮ ಮನಸ್ಸು ತಣಿಯೋ ಅಷ್ಟು ಸಂಗೀತ ಕೇಳ್ಬಿಡಬಹುದು ನೀವು. ನಿಜ ಹೇಳ್ಬೇಕಂದ್ರೆ ಸಂಗೀತ ಕೇಳೋ ನನ್ನ ಹುಚ್ಚು ಹೆಚ್ಚಿದ್ದು ಇಂತಾ ಎರಡು ’ಸಂಗೀತ ಕಾಲ’ಗಳನ್ನ ಕಳೆದ ಮೇಲೇನೆ.

ನಾನು ಮದ್ರಾಸಲ್ಲಿದ್ದಿದ್ದು ಎರಡು ವರ್ಷಕ್ಕಿಂತ ಕಡಿಮೆ. ಆಮೇಲೆ? ಮುಂದೆ ಹೋಗ್ಲೇಬೇಕಾಯ್ತು ಮತ್ತೊಂದೂರಿಗೆ. ಆಮೇಲೆ ಇಷ್ಟು ವರ್ಷದಲ್ಲಿ ಒಂದು ಸಲವೂ ನನಗೆ ’ಸೀಸನ್’ ನಲ್ಲಿ ಮದ್ರಾಸಿಗೆ ಭೇಟಿ ಕೊಡೋದಕ್ಕಾಗಿಲ್ಲ. ಆದ್ರೆ ನೆನಪುಗಳಿಗೇನು? ಸಾಲುಸಾಲಾಗಿ ಮೆರವಣಿಗೆ ಬರೋದ್ರಿಂದ ತಾನೆ ಅವಕ್ಕೆ ನೆನಪುಗಳು ಅನ್ನೋದು? ಬರ್ತಾನೇ ಇರತ್ವೆ. ಒಂದಲ್ಲ ಒಂದು ದಿವಸ ನಾನು ಹೋಗ್ತೀನಿ. ಪೂರಾ ತಿಂಗಳು ಯಾವ ಯೋಚನೆ ಮಾಡ್ದೆ ಸಂಗೀತ ಕೇಳ್ತೀನಿ. ಈ ವರ್ಷ ಆಗೋದಿಲ್ಲ ಗೊತ್ತು. ಮುಂದಿನ ವರ್ಷ ಆಗೋದೂ ಅನುಮಾನವೇ. ನಿಜ ಹೇಳ್ಬೇಕಂದ್ರೆ ಇನ್ನು ಹತ್ತುವರ್ಷ ಆದ್ರೂ ಆಗೋದು ಅನುಮಾನವೇ. ಮಕ್ಕಳು ದೊಡ್ಡವರಾಗಿ, ನಾನು ಕೆಲಸ ಮಾಡೋದು ನಿಲ್ಸೋ ತನಕವೂ ಆಗ್ದಿರಬಹ್ದು. ಯಾರಿಗ್ಗೊತ್ತು?

ಆದ್ರೆ ನನ್ನಾಸೆ ನಿಜವಾಗೋದಕ್ಕೆ ಕಾಯೋದಕ್ಕೆ ನಾನು ತಯಾರು. ಆಸೆಗಳೆಲ್ಲಾ ಕುದುರೆಗಳಾಗಿದ್ರೆ, ಒಂದಲ್ಲ ಒಂದು ದಿನ ಅವು ನನ್ನನ್ನ ಸ್ವರ್ಗಕ್ಕೇ ಕರ್ಕೊಂಡು ಹೋಗತ್ವೆ. ಹೌದು. ಸ್ವರ್ಗಕ್ಕೇ. ಸಂಗೀತದ ಸ್ವರ್ಗಕ್ಕೇ. ಮೈಲಾಪುರಕ್ಕೆ.

Popular posts from this blog

ಪತ್ರಿಕೆ, ಅಂಕಣಕಾರರು, ಭಗವದ್ಗೀತೆ ಮತ್ತು ಸತ್ಯಗಳು

ಹಲವರಿಗೆ ಪತ್ರಿಕೆಯಲ್ಲಿ ಬಂದದ್ದೆಲ್ಲಾ ಸತ್ಯ, ಪ್ರಕಟವಾಗಿದ್ದೆಲ್ಲ ನಿಜ ಅನ್ನುವ ಭ್ರಮೆ ಇರುತ್ತೆ. ಒಂದು ವಾದವಿದ್ದರೆ ಅದರ ಎಲ್ಲ ಮುಖಗಳನ್ನೂ ನೋಡಿ ಅವರವರ ತೀರ್ಮಾನ ಅವರು ತೆಗೆದುಕೊಳ್ಳುವುದೇನೋ ಸರಿಯೇ. ಆದರೆ ಈ ದಾರಿ ಹಿಡಿಯದೇ, ಪ್ರಕಟವಾದಮೇಲೆ ಅದು ಸರಿಯೇ ಇರಬೇಕು ಎಂದು ಕೊಳ್ಳುವುದು ಮಾತ್ರ ಹಳ್ಳ ಹಿಡಿಯುವ ದಾರಿ.

ಐದು  ವರ್ಷಗಳ ಹಿಂದೆ ಬರೆದಿಟ್ಟಿದ್ದ ಈ ಬರಹವನ್ನು ಇವತ್ತು, ಸ್ವಲ್ಪ ತಿದ್ದು ಪಡಿ ಮಾಡಿ, ಸ್ವಲ್ಪ ಸೇರಿಸಿ,  ಪ್ರಕಟಿಸಿದ್ದೇಕೆ ಎಂದರೆ, ಪ್ರಜಾವಾಣಿಯಲ್ಲಿ  ಐದು ವರ್ಷ ಹಿಂದೆ ಅಂಕಣವೊಂದರಲ್ಲಿ ಪ್ರಕಟವಾಗಿದ್ದ  ಬರಹವೊಂದು ಅವರಿವರ ಫೇಸ್ ಬುಕ್ ಗೋಡೆಗಳಲ್ಲಿ ಕಾಣಿಸಿಕೊಂಡಿದ್ದು. ಮತ್ತೆ ಹಲವರು  ಆ ಬರಹವನ್ನು ಹಂಚಿಕೊಂಡು, ಮರುಪ್ರಸಾರ ಮಾಡಿದ್ದೂ ನನ್ನ ಕಣ್ಣಿಗೆ ಬಿದ್ದುದರಿಂದ, ಹಿಂದೆ ನಾನು ಬರೆದಿಟ್ಟ ಟಿಪ್ಪಣಿಗಳು ನೆನಪಾದುವು!


ಈ ಬರಹದ ಬಗ್ಗೆ ಐದು ವರ್ಷಗಳ ಹಿಂದೆಯೇ, ಅಂದರೆ ಈ ಅಂಕಣ ಬರಹ ಪ್ರಜಾವಾಣಿಯಲ್ಲಿ ಬಂದಾಗಲೇ, ಗೂಗಲ್ ಬಜ಼್ ನಲ್ಲಿ ಒಂದಷ್ಟು ಚರ್ಚೆ ಆಗಿತ್ತು. ಪತ್ರಿಯೆಯ ಅಂಕಣದಲ್ಲಿ ಅಂಕಣಕಾರರು ಬರೆದದ್ದೆಲ್ಲಾ ಸತ್ಯ ಅಥವಾ ಸರಿ ಎಂದು ಕೊಂಡ ಕೆಲವು ಮಿತ್ರರು (ಏಕೆಂದರೆ ಅದು ಪ್ರಜಾವಾಣಿಯಂತಹ ಪತ್ರಿಕೆಯಲ್ಲೇ ಪ್ರಕಟವಾಗಿತ್ತಲ್ಲ!) ಈ ಬರಹವನ್ನು ಆಧಾರವಾಗಿಟ್ಟುಕೊಂಡು,  ಕೃಷ್ಣ ದ್ರಾವಿಡ ಭಾಷೆಯಾಡುತ್ತಿದ್ದವನೇ, ಅದರಲ್ಲೂ ಅವನು ಕನ್ನಡದವನೇ ಎಂದು ವಾದಿಸಿದ್ದರು. ಕೃಷ್ಣ ಕನ್ನಡದವನೇ ಅಲ್ಲವೇ ಅನ್ನುವುದನ್ನ…

ನಿಮ್ಮ ರಾಶಿ ಫಲ ನಿಮ್ಮದೇ ? ಅಲ್ಲವೇ?

ಪ್ರತಿದಿನ ಪತ್ರಿಕೆಯಲ್ಲಿ ದಿನಭವಿಷ್ಯ ನೋಡುವಂತಹ ಕೋಟ್ಯಂತರ ಜನಗಳಲ್ಲಿ ನೀವು ಒಬ್ಬರಾಗಿದ್ದರೆ, ಅಥವ ನಿಮ್ಮ ರಾಶಿ ಫಲವನ್ನು  ಪತ್ರಿಕೆಯಲ್ಲೋ, ಇಂಟರ್ನೆಟ್ ನಲ್ಲೋ ಆಗಾಗ ನೋಡುವ ಹವ್ಯಾಸ ನಿಮಗಿದ್ದರೆ, ಈ ಬರಹ ಓದೋದು ನಿಮಗೆ ಅತೀ ಅಗತ್ಯ. ಯಾಕೆ ಗೊತ್ತಾ? ನೀವು ನೋಡ್ತಾ ಇರೋ ರಾಶಿ ನೀವು ಹುಟ್ಟಿದ ರಾಶಿಯೇ ಅಲ್ಲದೆ ಇರಬಹುದು. ಇದೇನಪ್ಪಾ ನಾನು ಹುಟ್ಟಿದ್ದೇ ಸುಳ್ಳಾ ಹೀಗನ್ನೋಕೆ ಅಂದಿರಾ? ತಾಳಿ, ನಿಮಗೇ ಅರ್ಥವಾಗುತ್ತೆ. ಇನ್ನು ನಿಮಗೆ ಈ ಭವಿಷ್ಯ ಜ್ಯೋತಿಷ್ಯ ಇಂತಹದ್ದರ ಬಗ್ಗೆ ನಂಬಿಕೆ ಇಲ್ಲವೇ? ಅದರೂ, ಸುಮ್ಮನೆ ನಿಮ್ಮ ಆಕಾಶದ ಬಗ್ಗೆ ತಿಳುವಳಿಕೆಯನ್ನ ಹೆಚ್ಚಿಸಿಕೊಳ್ಳೋದಕ್ಕೆ ಓದಬಹುದು ನೀವಿದನ್ನ. ನಮ್ಮಲ್ಲಿ ಹಲವರು ನಾನು ಇಂಥ ನಕ್ಷತ್ರದಲ್ಲಿ ಹುಟ್ಟಿದೆ , ಇಂತಹ ರಾಶಿ ಅಂತ ಅಂದುಕೊಂಡಿರ್ತಾರೆ. ಅಂತಹವರಲ್ಲಿ ನೀವೂ ಸೇರಿದ್ದರೆ, ಈ ಜನ್ಮ ನಕ್ಷತ್ರಗಳು ಸಾಮಾನ್ಯವಾಗ ನೀವು ಹುಟ್ಟಿದಾಗ ಚಂದ್ರ ಆಕಾಶದಲ್ಲಿ ಯಾವ ನಕ್ಷತ್ರದ ಹತ್ತಿರ ಕಾಣಿಸ್ತಿದ್ದ ಅನ್ನೋದರ ಮೇಲೆ ಹೇಳಲಾಗುತ್ತೆ. ಚಂದಿರ ಆಕಾಶದ ಸುತ್ತಾ ಒಂದು ಸುತ್ತನ್ನ ಸುಮಾರು ೨೭ ದಿನದಲ್ಲಿ ಪೂರಯಿಸುತ್ತಾನೆ. ಹಾಗಾಗಿ ದಿನಕ್ಕೊಂದು ನಕ್ಷತ್ರ. ಈ ಇಪ್ಪತ್ತೇಳು ನಕ್ಷತ್ರಗಳು ೧೨ ರಾಶಿಗಳಲ್ಲಿ ಹಂಚಿರೋದ್ರಿಂದ, ಒಂದು ತಿಂಗಳ ಅವಧಿಯಲ್ಲಿ ಹುಟ್ಟಿರೋ ಒಂದಷ್ಟು ಜನರನ್ನ ನೋಡಿದರೆ, ಅವರು ಹುಟ್ಟಿದ ಚಾಂದ್ರಮಾನ ರಾಶಿ ಹನ್ನೆರಡು ರಾಶಿಗಳಲ್ಲಿ ಯಾವುದಾದರೂ ಆಗಿರಬಹುದು. ಇದು ಚಾಂದ್ರಮಾನದ ರೀತಿ. ಆದರೆ…

ಲಕ್ಷ್ಮೀ ಸ್ತುತಿ - ಕನಕಧಾರಾ ಸ್ತೋತ್ರ

ಮೊಗ್ಗೊಡೆದಿಹ ಲವಂಗ ಮರವನ್ನು ಮುತ್ತುತಿಹ
ಹೆಣ್ದುಂಬಿಯೋಲ್ ಹರಿಯ ಬಳಿಸಾರಿ ನಲಿವಾಕೆ
ಕಣ್ಣುಗಳ ಓರೆನೋಟದಲೆ ಸಕಲಸುಖವಿತ್ತು
ಒಳ್ಳಿತನು ತಂದೀಯಲಾ ಮಂಗಳೆ

ಜೇನ ಸವಿಯಲು ಚೆಲುವ ಕನ್ನೈದಿಲೆಯ ಕಡೆಗೆ
ಮರಮರಳಿ ಬರುತಲಿಹ ಜೇನ್ದುಂಬಿಯಂತೆ
ನಾಚುತಲಿ ಒಲವಿನಲಿ ಆ ಮುರಾರಿಯ ಮೊಗವ
ಓರಣದಿ ಹೊರಳುತಲಿ ನೋಡುತಿಹ ಮುಗುದೆ
ಹಿರಿಕಡಲ ಮಗಳ ಆ ಸೊಗದ ನೋಟದ ಮಾಲೆ
ತೋರುತಿರಲೆನಗೀಗ ಸಕಲ ಸಂಪದಗಳನೆ

ಹಾವ ಮೇಗಡೆ ಕಣ್ಣಮುಚ್ಚಿ ಪವಡಿಸಿರುವಂಥ
ಪತಿಯನ್ನು ಎವೆಯಿಕ್ಕದೆಯೆ ಪ್ರೀತಿಯಲ್ಲಿ
ನೋಡುತಿಹ ಕಮಲಕಣ್ಣವಳೋರೆ ನೋಟಗಳು
ಬೀಳುತಿರಲೆನ್ನೆಡೆಗೆ ಸಂತಸವ ತರಲು

ಕೌಸ್ತುಭವನಿಟ್ಟವಗೆ  ಮಧುವನ್ನು ಮಡುಹಿದಗೆ
ನಿನ್ನ ಕಣ್ನೋಟಗಳ ಸರವ ತೊಡೆಸಿಹಳೆ!
ಕಮಲದಲಿ ನಿಂದಿಹಳೆ ಬಯಸಿದ್ದನೀಯುವಳೆ
ತುಸು ಬೀರು ಎನ್ನೆಡೆಗೆ ಮಂಗಳವ ತರುತ

ಸಂಸ್ಕೃತ ಮೂಲ (ಆದಿ ಶಂಕರರ ಕನಕಧಾರಾ ಸ್ತೋತ್ರದಿಂದ): 

ಅಂಗಂ ಹರೇಃ ಪುಲಕ ಭೂಷಣ ಮಾಶ್ರಯಂತೀ
ಭೃಂಗಾಗನೇವ ಮುಕುಲಾಭರಣಂ ತಮಾಲಮ್ |
ಅಂಗೀಕೃತಾಖಿಲ ವಿಭೂತಿರಪಾಂಗಲೀಲಾ
ಮಾಂಗಲ್ಯದಾಸ್ತು ಮಮ ಮಂಗಳ ದೇವತಾಯಾಃ ||

ಮುಗ್ದಾ ಮುಹುರ್ವಿದಧತೀ ವದನೇ ಮುರಾರೇಃ
ಪ್ರೇಮತ್ರಪಾ ಪ್ರಣಿಹಿತಾನಿ ಗತಾಗತಾನಿ |
ಮಾಲಾದೃಶೋರ್ಮಧುಕರೀವ ಮಹೋತ್ಪಲೇ ಯಾ
ಸಾ ಮೇ ಶ್ರಿಯಂ ದಿಶತು ಸಾಗರ ಸಂಭಾವಾ ಯಾಃ ||

ಆಮೀಲಿತಾಕ್ಷಮಧಿಗಮ್ಯ ಮುದಾ ಮುಕುಂದ
ಮಾನಂದಕಂದಮನಿಷೇಷಮನಂಗ ನೇತ್ರಮ್ |
ಅಕೇಕರಸ್ಥಿತಕನೀನಿಕ ಪದ್ಮನೇತ್ರಂ
ಭೂತ್ಯೈ ಭವನ್ಮಮ ಭುಜಂಗಶಯಾಂಗನಾಯಾಃ ||

ಬಾಹ್ವಂತರೇ ಮಧುಜಿತಃ ಶ…