Posts

Showing posts from April, 2016

ಅಶೋಕ ವನದಲ್ಲಿ

Image
ಬೇಸರಿಸದಿರು ತಾಯಿ ಜಾನಕಿ
ಲೇಸು ಗಮನವ ಹರಿಸು ಮೇಗಡೆ
ಕೂಸು ಹನುಮನ ಪದವ ಕೇಳೆಂದಿರಲು ಮಾರುತಿಯು
ಮಾಸು ಬಟ್ಟೆಯನುಟ್ಟ ಮೈಥಿಲಿ
ಯೋಸರಿಸಿ ತಲೆಯೆತ್ತೆ ಮನವು
-ಲ್ಲಾಸವೆನಿಸಲು ನಗುವು ಮೂಡಿತು ವಾನರನ ಕಂಡು

-ಹಂಸಾನಂದಿ
ಕೊ: ಈ ಬಾರಿ ಪದ್ಯಪಾನದಲ್ಲಿ ಕೊಟ್ಟಿದ್ದ ದತ್ತಪದಿ ( ’ಸರಿ’ , ’ಗಮ’, ’ಪದ’, ’ನಿಸ’ ಎಂಬ ಪದಗಳನ್ನು ಬಳಸಿ, ಸೀತೆಯ ಬಗ್ಗೆ ಯಾವುದಾದರೂ ಪದ್ಯ ಬರೆಯಬೇಕೆಂಬ) ಪ್ರಶ್ನೆಗೆ ನನ್ನ ಉತ್ತರವಿದು. ಈ ಉತ್ತರವು ಭಾಮಿನಿ ಷಟ್ಪದಿಯಲ್ಲಿದೆ.

ಕೊ.ಕೊ: ಕೊಟ್ಟ ಪದಗಳನ್ನು ಛಂದೋಬದ್ಧವಾಗಿ ಪದ್ಯದಲ್ಲಿ ಹೆಣೆಯುವುದಕ್ಕೆ ದತ್ತಪದಿ ಎಂದು ಹೆಸದು. ಕೆಲವೊಮ್ಮೆ ಇಂತಹದೇ ಛಂದಸ್ಸಿನಲ್ಲಿ ಬರೆಯಬೇಕೆಂಬ ನಿಯಮವೂ ಇರಬಹುದು.
ಕೊ.ಕೊ.ಕೊ: ಸಾಮಾನ್ಯವಾಗಿ, ಕೊಟ್ಟ ಪದಗಳು, ಒಂದು ಸಾಲಿನಲ್ಲಿ ಒಂದರಂತೆ, ಕೊಟ್ಟ ಕ್ರಮದಲ್ಲೇ ಮತ್ತು, ಆ ಪದಗಳ ನೇರ ಅರ್ಥವನ್ನು ಬಳಸದೇ ಬರಬೇಕೆಂಬುದು ರೂಢಿ.
ಚಿತ್ರ ಕೃಪೆ - ಅಂತರ್ಜಾಲ

ಯುಗಾದಿ ಆಶಯ

Image

ಪಂಚವಟಿಯಲ್ಲಿ ಮೊದಲ ದಿನ

Image
ರಾಮ ಸೀತೆ ಲಕ್ಷ್ಮಣರು ಪಂಚವಟಿಯಲ್ಲಿ ಕೆಲಕಾಲವಿದ್ದ ಕಥೆ ಯಾರಿಗೆ ಗೊತ್ತಿಲ್ಲ?  ಕಲಾವಿದ ರಮೇಶ್ ಆಚಾರ್ಯ ಅವರ, "ಪಂಚವಟಿಯಲ್ಲಿ" ಚಿತ್ರವನ್ನು ನೋಡಿ ಬರೆದ  ನಾಲ್ಕು ಭಾಮಿನಿ ಷಟ್ಪದಿಗಳು ಇಲ್ಲಿವೆ:

ತರುಣಿ ಹರಿಯುವ ನದಿಯ ನೋಡುತ
ಲರುಹಿದಳು ತನ್ನಿನಿಯ ರಾಮಗೆ
ಹರುಷ ತರುವೀ ತಾಣವಿದು ಬಲು ಸೊಗಸುಕಾಣುತಿದೆ|
ಸುರಗಿ ಹೂಗಳು ಬಿರಿದು ಸುತ್ತಲು
ಪರಿಮಳವ ಹರಡಿಹವು ಕೇಳ್ ನಾ-
ವಿರಲಿಕಿದುವೇ ಸೊಗದ ನೆಲೆಯಹುದೆಂದಳಾ ಸೀತೆ || 1 ||

ಇಳೆಯ ತನುಜೆಯ ಕೂಡೆ ರಾಮನು
ಬಳಿಯ ಗೋದಾವರಿಯ ದಡದ-
ಲ್ಲಿಳಿದು ನಿಂತನು ಮೆಚ್ಚಿದನು ಎಡೆ ತಕ್ಕುದಹುದೆನುತ |
ಉಳಿದಿರುವ ವನವಾಸ ಕಾಲವ
ಕಳೆಯೆ ಸೊಗವಿದೆನುತಿರೆ ಸುತ್ತಣ
ಗಿಳಿಯವಿಂಡುಗಳಳಿಸಮೂಹವು ಹರ್ಷ ತೋರಿದವು || 2 ||

ಮಡದಿಯಾಸೆಯ ಕೇಳಿ ರಾಮನು
ಸಡಗರವ ತೋರುತಲಿ ಲಕ್ಷ್ಮಣ
ನೊಡನೆ ಅಲ್ಲೇ ಪರ್ಣಕುಟಿಯನು ನಿರ್ಮಿಸಲು ಹೇಳಿ |
ಎಡದ ಕಡೆಯಲಿ ಗೌತಮೀ ನದಿ
ಯೆಡೆಗೆ ಹೆಂಡತಿಯನ್ನು ಕರೆದೊ-
ಯ್ದುಡುಗೊರೆಯನಿತ್ತಿಹನು ಮುಡಿಯಲಿ ಕೇದಗೆಯ ಹೂವ || 3 ||

ಸುಗುಣಿ ಲಕ್ಷ್ಮಣನಣ್ಣನಾಣತಿ ತೆಗೆದು ಹಾಕುವನೇನುಯೆಂದಿಗು? ಹೆಗಲ ಮೇಗಡೆ ಹೊತ್ತು ತಂದನು ರೆಂಬೆಕೊಂಬೆಗಳ | ಹಗಲು ಮೀರುವ ಮುನ್ನ ಕಟ್ಟುತ ಮುಗಿಸಿ ಹೊಸ ಕುಟಿಯನ್ನು ಕರೆದಿಹ ಹಗುರ ಮನದಲ್ಲಣ್ಣ ಅತ್ತಿಗೆಯನ್ನೊಳಕೆ ಬರಲು || 4 ||
-ಹಂಸಾನಂದಿ
ಚಿತ್ರ ಕೃಪೆ: ಕಲಾವಿದ ರಮೇಶ್ ಆಚಾರ್ಯ ಅವರ "ಪಂಚವಟಿಯಲ್ಲಿ" ವರ್ಣ ಚಿತ್ರ.